Leev Lückscher in Düx un Poll!
Im Evangelium vum Sonndag deit uns Jesus jet sage,
dodrüvver, wie mir uns off met uns Mitminsche plage.
Dat mir off beim Andere vill Schlächtes wohrnemme,
jo ne Splitter in singem Aug künne mir erkenne.
Während et schwer is, sich zo nem Blick in dä Speegel durchzeringe
un dä Balke in unserem eijenen Aug ze finge.
Doch Jesus jitt uns och Mod, noh dem Andere ze loore
un noh dem Beste, nit noh dem Schlächteste in im ze frooge.
Luurt nit nur noh Balke, Splittere, Kante un Ecke,
vielleicht jitt et jo an dem Minsch noch jet anderes ze entdecke.
Jesus hät uns all die Rejele jejevve,
su dat mir joot zesamme levve.
Godd jit uns de Kraff, an dat Joode ze jläuve,
statt Angs un Ärjer anzehäufe.
Loot uns nit et Dräume verleere,
och wenn de Welt sich deit verröck opföhre.
Op dat in unserem Levve dat Miteinander jewinnt
un einer dem andere et Joode jünnt.
Op dat in uns Hätze der Fruhsinn spillt,
domet der Mungk dovun üvverquillt.
Maria Schwarz, Pastoralreferentin